Իսրայելի արտգործնախարարը հակադարձել է Թուրքիայի նախագահին, ով այսօր պնդել էր, թե Նեթանյահուն գերազանցեց Հիտլերին:
«Զավեշտալի է, որ բարոյականության և միջազգային իրավունքի մասին խոսում է մեկը, ով չի թաքցնում իր իմպերիալիստական հավակնությունները, ով ներխուժել է Սիրիայի հյուսիս և անօրինական կերպով տիրապետում է Հյուսիսային Կիպրոսին», - գրել է Գիդեոն Սաարը X-ում։
Հայաստանն այս օրերին փորձում է աջակցել ոչ միայն Իրանում գտնվող Հայաստանի քաղաքացիներին, կամ իրանահայերին, այլև տարբեր երկրների քաղաքացիներին տարհանման, ապաստան տանելու հետ կապված:
«Պրոցեսի մեջ ենք... սա շարունակական պրոցես է, և ինչպես կարող ենք գնահատել, առաջիկա օրերին ծավալները միայն կավելանան»,- այսօր խորհրդարանում ասաց արտգործնախարար Արարատ Միրզոյանը՝ խոսելով Իրան-Իսրայել հակամարտության մասին, որ շարունակվում է արդեն վեցերորդ օրը:
Միացյալ Նահանգների նախագահ Դոնալդ Թրամփը հայտարարել է, որ Իրանն ամբողջությամբ անպաշտպան է, օդային պաշտպանություն առհասարակ չունի՝ կրկին պնդելով, որ Թեհրանը պետք է առանց նախապայմանների գործարք կնքի։
Իսրայելը հարվածել է Իրանի Կարմիր մահիկի ընկերության գլխավոր գրասենյակին, հայտնում են իրանական լրատվամիջոցները։
Իսրայելը հայտարարել է, որ հարված է հասցրել Իրանի ներքին անվտանգության ծառայության շտաբ-բնակարանին։ Պաշտպանության նախարար Իսրայել Կացը հայտարարել է, որ Իսրայելի ռազմաօդային ուժերի կործանիչները հենց նոր «ոչնչացրել են իրանական ռեժիմի ներքին անվտանգության ծառայության շտաբը, որը համարվում է իրանական բռնապետի ռեպրեսիաների գլխավոր գործիքը»։
«Ինչպես խոստացել էինք, մենք շարունակելու ենք հարվածներ հասցնել Իրանի իշխանության խորհրդանիշներին և այաթոլաների ռեժիմին՝ անկախ նրանից, թե որտեղ են նրանք», - ասել է Կացը:
Թեհրանը դեռ չի մեկնաբանել այս լուրը:
Թեհրանի արևելյան տարբեր շրջաններ կրկին Իսրայելի հարձակումների թիրախում են հայտնվել, հայտնում է «Ազատության» իրանական ծառայությունը: Հարձակման ենթարկված վայրերի վերաբերյալ մանրամասները դեռևս չեն հրապարակվել։
Իսրայելի բանակը հայտարարում է, որ հարվածներ է հասցնում Թեհրանում գտնվող ռազմական թիրախներին։
Իրանի միջուկային օբյեկտները՝ քարտեզով
Հեռախոսազրույց են ունեցել Ռուսաստանի ու ԱՄԷ նախագահները, քննարկել Մերձավոր Արևելքում ստեղծված իրավիճակը։
Կրեմլի փոխանցմամբ՝ Պուտինը կրկին ասել է, որ Մոսկվան շարունակում է պատրաստակամություն հայտնել Իրանի և Իսրայելի միջև միջնորդական առաքելություն ստանձնելու հարցում։ Ըստ հաղորդագրության՝ առաջնորդները կոչ են արել անհապաղ դադարեցնել հակամարտությունը և ակտիվացնել դիվանագիտական ջանքերը։
Իրանի գերագույն հոգևոր առաջնորդ Ալի Խամենեին հայտարարել է՝ Իսրայելը մեծ սխալ է թույլ տվել և դրա համար կպատժվի:
«ժողովուրդը չի մոռանա իրենց տարածքի վրա հարձակումը», - «Մեհր» գործակալության փոխանցմամբ՝ ասել է Իրանի գերագույն հոգևոր առաջնորդը։
Իրանի պետական հեռուստատեսության եթերում հեռարձակված ուղերձում իսլամական հանրապետության գերագույն հոգևոր առաջնորդ այաթոլա Ալի Խամենեին նաև ասել է. «Միացյալ Նահանգների կողմից Իրանին հասցված ցանկացած հարված անդառնալի և ծանր հետևանք կունենա»։
«Իրանն օժտված է Իսրայելի խելագար հարձակումներից պաշտպանվելու բոլոր օրինական, լեգիտիմ և բնական իրավունքներով», - այսօր հայտարարել է Թուրքիայի նախագահ Ռեջեփ Էրդողանը։
Թուրքիայի նախագահի խոսքով, Իսրայելը Իրանին հարվածեց՝ «չսպասելով միջուկային համաձայնագրի շուրջ բանակցությունների ավարտին»։
«Իսկ Գազայում ցեղասպանության հարցում Նեթանյահուն գերազանցել է Հիտլերին», - եզրափակել է Էրդողանը։