Պատերազմ Ուկրաինայում (լայվ բլոգ, թարմացվող)

Մեծ Բրիտանիայի վարչապետ Բորիս Ջոնսոնը հայտարարել է «Աէրոֆլոտ» ռուսաստանյան ավիաընկերության և ռուսական բանկերի, այդ թվում՝ ՎՏԲ-ի դեմ պատժամիջոցներ սահմանելու մասին։ Նրա խոսքով՝ ՎՏԲ-ի բոլոր ակտիվները կսառեցվեն։

Ռուսաստանյան առաջատար ավիաընկերության չվերթները դեպի Մեծ Բրիտանիա կարգելվեն։

Կանադան լրացուցիչ պատժամիջոցներ է սահմանում Ռուսաստանում 58 ֆիզիկական անձանց և կազմակերպությունների, այդ թվում՝ ռուսաստանյան վերնախավի ներկայացուցիչների և նրանց ընտանիքների նկատմամբ։ Այս մասին հայտարարել է վարչապետ Ջասթին Թրյուդոն։

Պատժամիջոցներ են կիրառվել մասնավորապես ՌԴ Անվտանգության խորհրդի անդամների, ներառյալ` ֆինանսների նախարար Անտոն Սիլուանովի, պաշտպանության նախարար Սերգեյ Շոյգուի և արդարադատության նախարար Կոնստանտին Չույչենկոյի դեմ։ Կանադան նաև կչեղարկի Ռուսաստանին ավելի վաղ տրված արտահանման թույլտվությունները։

ԱՄՆ նախագահ Ջո Բայդենը հայտարարում է Վաշինգտոնի կողմից Ռուսաստանի դեմ նոր կոշտ պատժամիջոցների սահմանման մասին, որոնք, Սպիտակ տան ղեկավարի խոսքով, լուրջ հարված կհասցնեն Ռուսաստանի տնտեսության վրա ինչպես անմիջապես, այնպես էլ ժամանակի ընթացքում:

Ամերիկյան կառավարությունը, մասնավորապես, սահմանափակումներ է կիրառում ռուսական բանկերի նկատմամբ, որոնց ակտիվները կազմում են առնվազն մեկ տրիլիոն դոլար։ Դրանց թվում է ռուսաստանյան մեծությամբ երկրորդ՝ ՎՏԲ բանկը։

Օդեսայի ափերի մոտ թուրքական նավ է ռմբակոծվել։ Թուրքական նավագնացության գերատեսչությունը հաղորդում է, որ տուժածներ չկան, նավը գտնվում է անվտանգ վայրում։

Ռուսական ուժերը Օդեսայի մոտ ռազմական գործողություններ են իրականացնում։

Ռուսաստանի կողմից Ուկրաինա ներխուժելու առաջին օրը առնվազն 57 մարդ է զոհվել, 169-ը վիրավորվել են։ Տվյալները հաղորդել է Ուկրաինայի առողջապահության նախարարությունը։

Ֆրանսիայի նախագահ Էմանյուել Մակրոնը հեռախոսազրույց է ունեցել Ուկրաինայի նախագահ Վլադիմիր Զելենսկու հետ։ Նրա հետ խորհրդակցելուց հետո Մակրոնը զանգահարել է Ռուսաստանի նախագահ Վլադիմիր Պուտինին և պահանջել անհապաղ դադարեցնել ռազմական գործողությունները, հաղորդում է Ելիսեյան պալատը։

Կրեմլի մամուլի ծառայության փոխանցմամբ՝ Ռուսաստանի և Ֆրանսիայի նախագահներն անկեղծորեն մտքեր են փոխանակել Ուկրաինայում տեղի ունեցող իրադարձությունների վերաբերյալ։

Ուկրաինայի ներքին գործերի փոխնախարար Անտոն Գերաշչենկոն այսօր լուսադեմին հայտարարել է Կիևի մոտ 6 պայթյունի մասին։ Նրա խոսքով՝ «գրոհներն իրականացվում են թևավոր կամ բալիստիկ հրթիռներով»։

Ուկրաինական պաշտոնական աղբյուրները հայտնում են, որ Կիևում բնակելի շենք է այրվում, որի վրա հրթիռի բեկորներ են ընկել։ Նախնական տվյալներով՝ երեք մարդ է վիրավորվել, նրանցից մեկի վիճակը ծանր է։

Ավելի վաղ Սումիի շրջանի ղեկավար Դմիտրի Ժիվիցկին ֆեյսբուքյան իր էջում հայտնել էր, որ ռուս զինվորականները տվյալ շրջանից շարժվում են դեպի Կիև։

Գիշերը Ուկրաինայի նախագահ Վլադիմիր Զելենսկին հերթական տեսաուղերձով է հանդես եկել, որում ամփոփել է ռուսական ներխուժման առաջին օրվա արդյունքները։ Զելենսկու խոսքով՝ երկրի զինված ուժերը հետ են մղել հակառակորդին։ Նա ասել է, որ նախնական տվյալներով՝ երեկ 137 ուկրաինայի քաղաքացի է զոհվել՝ զինվորականներ և քաղաքացիական անձինք։ Բոլոր սահմանապահները, ովքեր պաշտպանել են Սև ծովում գտնվող Զմեինի կղզին, մահացել են։

Զելենսկին հայտնել է, որ մնում է Կիևում, թեև «թիվ մեկ թիրախն է»:

Զելենսկին փոխանցել է, որ բանակցել է ՆԱՏՕ-ի երկրների ղեկավարների հետ՝ Ուկրաինայի դաշինք մտնելու շուրջ, սակայն «բոլորը վախենում են»։

Ուկրաինայի նախագահի խոսքով՝ ինքը պատրաստ է բանակցությունների, սակայն այժմ երկրի ճակատագիրը կախված է բանակից։

Միացյալ Նահանգների պետքարտուղար Էնթոնի Բլինքենը երեկ ասել է, որ Վլադիմիր Պուտինը կփորձի գրավել Կիևը և տապալել Վլադիմիր Զելենսկու կառավարությունը։ Ուկրաինայի մայրաքաղաքն «անկասկած կանգնած է գրավման վտանգի առաջ», ու «շատ հնարավոր է, որ շրջափակման մեջ հայտնվի», հայտարարել է Բլինքենը CBS News-ին տված հարցազրույցում։

«Ուկրաինան մենակ է մնացել, համաշխարհային ուժերը հեռվից հետևում են իրավիճակին, նախօրեին կիրառված պատժամիջոցները բավարար չեն», - հայտարարում է Վլադիմիր Զելենսկին։