Պատերազմ Ուկրաինայում (լայվ բլոգ, թարմացվող)

Եվրամիության անդամ երկրները համաձայնության են եկել Ռուսաստանի դեմ պատժամիջոցների նոր փաթեթի շուրջ՝ Ուկրաինա ներխուժելու համար։

Բրյուսելի նոր պատժամիջոցները կազդեն ռուսական բանկային հատվածի և խոշոր պետական ընկերությունների 70 տոկոսի վրա՝ ներառյալ ռազմական արդյունաբերությունը։ Եվրամիությունը նախատեսում է արգելել նավթի արտահանումը և «անհնարին դարձնել Ռուսաստանի համար իր նավթավերամշակման գործարանների բարելավումը»: Բացի այդ, ԵՄ-ը կարգելի օդանավերի և ավիացիոն տեխնիկայի վաճառքը ռուսական ավիաընկերություններին։ Ռուս դիվանագետներն ու գործարարներն այլևս չեն կարողանա արտոնյալ կարգով ԵՄ մուտքի վիզաներ ստանալ:

Ֆրանսիայի նախագահ Էմանյուել Մակրոնը հայտարարել է, որ Եվրամիության կողմից հայտարարված պատժամիջոցներից բացի, Ֆրանսիան սեփական պատժամիջոցները կսահմանի Ռուսաստանի դեմ։ Դրանք կազդեն Ռուսաստանի մի շարք քաղաքացիների վրա: Այդ պատժամիջոցների մասին կհայտարարվի ավելի ուշ։ Բացի այդ, Ֆրանսիան Կիևին կտրամադրի ռազմական տեխնիկա և 300 միլիոն եվրոյի չափով ֆինանսական օգնություն։

Թուրքիան կարող է սահմանափակել Բոսֆորի ու Դարդանելի նեղուցներով ռուսական ռազմանավերի անցումը, սակայն դրանք իրավունք կունենան վերադառնալ իրենց բազաներ, հայտարարել է երկրի արտգործնախարար Մևլյութ Չավուշօղլուն։

Կիևի հյուսիս-արևմտյան ուղղությամբ երեք կամուրջ է պայթեցվել՝ ռուսական զորքերի անցումը կասեցնելու համար, հայտնում է «Ուկրաինսկա Պրավդա»-ն՝ հղում անելով ուկրաինական բանակի գլխավոր շտաբի աղբյուրներին։

Ըստ UNIAN-ի, Վիշգորոդ քաղաքում՝ Կիևից մոտ 6,5 կմ հեռավորության վրա, հրետանու ձայներ են լսվում։ Քաղաքում մարդիկ դուրս են գալիս փողոց, երևում են պայուսակներով և երեխաների հետ վազող ընտանիքներ: Ով կարող է՝ հեռանում է մեքենայով:

Ուկրաինական բանակի գլխավոր շտաբում «Ուկրաինսկա Պրավդա»-ի աղբյուրները հայտնել են, որ ռուս զինվորականները Վիշգորոդով կշարժվեն դեպի Կիև։

Ուկրաինայի միջուկային կարգավորման պետական տեսչությունը հայտնել է, որ Չեռնոբիլի ատոմակայանի գոտում ռադիացիայի մակարդակի աճ է գրանցվել․ ցուցանիշների բարձրացում է արձանագրվել դիտակետերի զգալի մասում։ Բայց այս տարածքում ռազմական գործողությունների պատճառով ներկայումս անհնար է պարզել ռադիացիոն ֆոնի փոփոխության պատճառները։

Արևմտյան ռազմական վերլուծաբաններն ասում են, որ Չեռնոբիլը գրավելով՝ Ռուսաստանը պարզապես օգտագործել է Բելառուսից ամենաարագ ներխուժման ճանապարհը դեպի Կիև:

Հեռախոսազրույց են ունեցել Իրանի և Ռուսաստանի նախագահները։

Պաշտոնական Թեհրանի նախաձեռնությամբ տեղի ունեցած զրույցի ընթացքում Վլադիմիր Պուտինը Էբրահիմ Ռաիսիին տեղեկացրել է Ուկրաինայի շուրջ իրավիճակի զարգացման մասին։ Կրեմլի փոխանցմամբ՝ Իրանի նախագահն «ըմբռնում է հայտնել անվտանգության ոլորտում Ռուսաստանի մտահոգությունների վերաբերյալ՝ կապված ԱՄՆ-ի և ՆԱՏՕ-ի ապակայունացնող գործողությունների հետ»։ «Ռուսաստանի նախագահ Վլադիմիր Պուտինը ստեղծված իրավիճակը բնութագրել է որպես օրինական պատասխան տասնամյակների ընթացքում անվտանգության պայմանագրերի խախտման և իր երկրի անվտանգությունը խաթարելու Արևմուտքի ջանքերին», - փոխանցում է Իրանի նախագահի մամլո ծառայությունը։

Պաշտոնական Բաքուն աջակցություն չի հայտնում Կիևին։ «Ադրբեջանը հետևում է Ուկրաինայի շուրջ իրադարձություններին», - հայտարարել է Ադրբեջանի նախագահի արտաքին հարցերով բաժնի ղեկավար Հիքմեթ Հաջիևը։

Anonymous հաքերային խումբը կիբերպատերազմ է հայտարարել ռուսաստանյան կառավարությանը։ «Anonymous թիմը պաշտոնապես պատերազմ է հայտարարում Ռուսաստանին», - ասվում է Թվիթերում խմբի հրապարակման մեջ, որին ավելացվել է #Ukraine հեշթեգը։ Հաքերներն արդեն պատասխանատվություն են ստանձնել Russia Today հեռուսաստաընկերության կայքի վրա հարձակման համար։ Երեկվանից հասանելիության հետ կապված խնդիրներ ունեն նաեւ Կրեմլի, Ռուսաստանի կառավարության, խորհրդարանի կայքերը։

Վրաստանը, հաշվի առնելով երկրի ազգային և ժողովրդի շահերը, չի պլանավորում միանալ Ռուսաստանի դեմ Արևմուտքի տնտեսական և ֆինանսական պատժամիջոցներին։ Պատժամիջոցների սահմանումը «ավելի մեծ վնաս կհասցնի մեր երկրին և մեր ժողովրդին», - այսօր հայտարարել է վարչապետ Իրակլի Ղարիբաշվիլին։