- Հեղինակ՝ Ռոբերտ Զարգարյան
Մի խումբ քաղաքացիներ, այդ թվում` ուկրաինացիներ այսօր Երևանում Ռուսաստանի դեսպանատան դիմաց բողոքի ցույց էին կազմակերպել՝ հաջակցություն Ուկրաինայի: «Ուզում ենք, որ Հայաստանը աջակցի մեզ այս դժվար պահին»,- ասում են այստեղ բնակվող ուկրաինացիները:
- Հեղինակ՝ Տաթևիկ Սարգսյան
Անկարան անընդունելի է համարում Ռուսաստանի զինված ուժերի կողմից Ուկրաինայի նկատմամբ սկսված ռազմական գործողությունները:
«Թուրքիան դեմ է զենքի միջոցով սահմանների փոփոխմանը», - հայտարարել է Թուրքիայի արտաքին գերատեսչությունը, Ռուսաստանին կոչ արել անհապաղ դադարեցնել «այս անօրինական գործողությունը»՝ աջակցություն հայտնելով Ուկրաինայի քաղաքական միասնությանը, ինքնիշխանությանն ու տարածքային ամբողջականությանը:
- Հեղինակ՝ Հրաչ Մելքումյան
Վլադիմիր Զելենսկին ասել է, որ ուկրաինական կողմը լուրջ կորուստներ ունի, և դոնորներին կոչ է արել արյուն հանձնել։
Ռուսաստանի ներխուժման առաջին ժամերի մասին տեղեկությունները հակասական են, մասնավորապես հաղորդվել է, որ 40 ուկրաինացի է զոհվել, ևս 10-ը վիրավորվել են։
- Հեղինակ՝ Լուսինե Մուսայելյան
ՆԱՏՕ-ն ավելացնում է Արևելյան Եվրոպայում զինվորականների թիվը։ «Ռուսաստանի գործողությունները լրջագույն սպառնալիք են եվրատլանտյան անվտանգության համար, և դրանք կունենան աշխարհա-ռազմավարական հետևանքներ։ ՆԱՏՕ-ն շարունակում է ձեռնարկել բոլոր անհրաժեշտ քայլերը իր դաշնակիցների պաշտպանության և անվտանգության համար։ Մենք լրացուցիչ ցամաքային և օդային ուժեր ենք ուղարկում դաշինքի արևելյան սահմաններ, ինչպես նաև ուժեղացնում ենք նավատորմը։ Մենք բարձրացրել ենք մեր ուժերի պատրաստականությունը ցանկացած չնախատեսված հանգամանքներին արձագանքման համար», - ասվում է Հյուսիսատլանտյան դաշինքի հայտարարությունում։
- Հեղինակ՝ Հրաչ Մելքումյան
«Եվս մեկ անգամ ցանկանում եմ դիմել Թուրքիայի իշխանություններին և ժողովրդին՝ օգնեք Ուկրաինային», - Անկարայում կայացած ճեպազրույցում հայտարարել է Թուրքիայում Ուկրաինայի դեսպան Վասիլ Բոդնարը։
«Մենք կոչ ենք անում փակել օդային տարածքը և Բոսֆորի ու Դարդանելի նեղուցները։ Մեր պահանջները փոխանցել ենք թուրքական կողմին։ Միաժամանակ ցանկանում ենք պատժամիջոցներ սահմանել Ռուսաստանի հանդեպ», - ասել է Բոդնարը։
- Հեղինակ՝ Հրաչ Մելքումյան
Եվրոպական առաջնորդները «բարբարոսական» են համարում Ռուսաստանի հարձակումը։ Եվրամիությունը կշարունակի աջակցել Ուկրաինային և նրա ժողովրդին, ասել է Եվրահանձնաժողովի նախագահ Ուրսուլա ֆոն դեր Լայենը՝ տեղեկացնելով՝ այսօր եվրոպական առաջնորդների հաստատմանը կներկայացնեն զանգվածային և նպատակային պատժամիջոցների փաթեթ։
«Սա Եվրոպայի ամենամռայլ ժամերն են երկրորդ համաշխարհային պատերազմից հետո», - հայտարարել է Եվրամիության արտաքին քաղաքականության ու անվտանգության հարցերով հանձնակատար Ժոզեպ Բորելը՝ նշելով․ - «Սա ոչ միյան միջազգային իրավունքի ամենամեծ խախտումն է, այլև մարդկային համակեցության հիմնարար սկզբունքների խախտում»։
- Հեղինակ՝ Հրաչ Մելքումյան
«Նովայա գազետա» թերթի գլխավոր խմբագիր, Նոբելյան խաղաղության մրցանակակիր Դմիտրի Մուրատովը իր ձայնն է բարձրացրել ընդդեմ Ուկրաինայի դեմ պատերազմի։
«Նովայա գազետայի» այս համարը մենք կթողարկենք երկու լեզուներով՝ որովհետև մենք երբեք Ուկրաինան թշնամի չենք ճանաչի, իսկ ուկրաներենը՝ թշանամու լեզու», - ասել է նա իր տեսաելույթում։
