Ռուսական իշխանությունները հայտնում են Մոսկվայի ուղղությամբ հարվածային անօդաչու թռչող սարքերի նոր հարձակման փորձի մասին։
Ռուսաստանի պաշտպանության նախարարության և Մոսկվայի քաղաքապետ Սերգեյ Սոբյանինի տեղեկություններով՝ անցած գիշեր հարվածային դրոններից մեկը ՀՕՊ ուժերի կողմից չեզոքացվել է Իստրայի շրջանում, մյուսը՝ Ռամենսկոյե քաղաքի մերձակայքում։
Ռուսական աղբյուրների հաղորդման համաձայն՝ տուժածներ չկան։ Հարձակման հետևանքով մոսկովյան «Շերեմետևո», «Վնուկովո» և «Դոմոդեդովո» օդանավակայաններում վեց չվերթ չեղարկվել է, ևս 30-ը հետաձգվել են։
Ռուսաստանի ՊՆ-ն նաև հաղորդել է, որ անցած գիշեր վեց ԱԹՍ-է խոցվել Ղրիմի ափերի մոտ։
ԱՄՆ-ի նախագահ Ջո Բայդենը սեպտեմբերի 21-ին Վաշինգտոնում կընդունի Ուկրաինայի նախագահ Վլադիմիր Զելենսկուն։ Այս մասին բրիֆինգում հայտնել է Սպիտակ տան անվտանգության հարցերով խորհրդական Ջեյք Սալիվանը։
«Սա կլինի նրանց երրորդ հանդիպունը, որը տեղի կունենա ծայրահեղ կարևոր շրջանում, քանի որ Ռուսաստանն Ուկրաինայի դեմ դաժան պատերազմի համար օգնություն է փնտրում այնպիսի երկրներում, ինչպիսին է Հյուսիսային Կորեան», - նշել է Սալիվանը։
Նա նաև ասել է, որ գալիք շաբաթ ԱՄՆ-ը հնարավոր է հայտարարի Ուկրաինային օգնության նոր փաթեթ տրամադրելու մասին։
Անցած մեկ օրում ռուսական ուժերը ռմբակոծել են ուկրաինական ութ մարզեր։ Զապորոժիեի մարզային իշխանությունները հաղորդում են ավիահարվածների հետևանքով Օրեխովո բնակավայրում երկու կնոջ վիրավորվելու մասին։
ՌԴ պաշտպանության նախարարությունը, իր հերթին, ուկրաինական ուժերին մեղադրել է անօդաչուների միջոցով Ռուսաստանի տարածքում գտնվող օբյեկտների վրա հարձակումների փորձերի մեջ։ Հաղորդվում է, որ Կալուգայի ու Տվերի մարզերում հակաօդային պաշտպանության համակարգերը երկու անօդաչու են ոչնչացրել։ Տուժածներ չկան։
Շաբաթ առավոտյան մոսկովյան օդանավակայաններից ավելի քան երեք տասնյակ թռիչք էր հետաձգվել։
Գերմանիայի պաշտպանության նախարար Բորիս Պիստորիուսը հերքել է պնդումները, թե կանցլեր Օլաֆ Շոլցը ձգձգում է Կիևին Taurus տեսակի թևավոր հրթիռների մատակարարումը: Նա չի բացառել, որ հարցը կլուծվի առաջիկա շաբաթների ընթացքում:
«Դա վստահության խնդիր չէ, այլ երաշխիքների, որ հրթիռները չեն ուղղվի բուն ռուսական տարածքի վրա: Մենք՝ կանցլերը, ես և մեր կաբինետի մյուս անդամները, պարտավորվել ենք կանխել Գերմանիայի ժողովրդին սպառնացող վտանգները, դա մեր խնդիրն է»,- ասել է Պիստորիուսը Մյունսթերում Վեստֆալիայի խաղաղության կնքման 375-ամյակին նվիրված միջոցառման ընթացքում:
Նա հավատացրել է, որ Գերմանիան ցանկանում է ըստ ամենայնի աջակցել Ուկրաինային, և եթե Taurus-ների վերաբերյալ որոշում կայացվի առաջիկա մեկ-երկու շաբաթում, ապա այն անպայման կիրագործվի:
«Նա [կանցլեր Շոլցը] չի տատանվում, ցանկացած որոշում կայացնելիս անհրաժեշտ է ծանրութեթև անել, մտածել հնարավոր հետևանքների մասին»,- ասել է Գերմանիայի պաշտպանության նախարարը և ավելացրել, թե չի կարելի մոռանալ, որ «խոսքն այսօրվա դրությամբ առաքվածներից ամենահեռահար հրթիռների մասին է», - ասել է Գերմանիայի պաշտպանության նախարարը:
Ռուսաստանը ՆԱՏՕ-ի երկրներին մեղադրում է Ուկրաինային զենք տրամադրելու համար, պնդելով, թե դա միայն նպաստում է հակամարտության շարունակմանը: Ըստ Մոսկվայի, այդ մատակարարումներով Արևմուտքը դառնում է ռազմական առճակատման անմիջական մասնակից:
Ուկրաինայի զինված ուժերի գլխավոր շտաբը հայտնում է Բախմուտի մոտակայքում գտնվող Անդրեևկա գյուղը գրավելու մասին:
«Հարձակողական գործողությունների ընթացքում մեր ուժերը մասնակի հաջողություններ են գրանցել Կլեշչևկայի մոտ և գրավել են Անդրեևկան»,- ասվում է հաղորդագրության մեջ։
Այն Բախմուտի մոտ գտնվող առաջին բնակավայրն է, որն ուկրաինացիները կարողացել են հետ գրավել: Գարնանը ռուսները՝ «Վագների» մասնավոր ռազմական ընկերության մասնակցությամբ, արյունալի մարտերի արդյունքում գրավել են այդ տարածքը:
Կլեշչեևկան և Անդրեևկան գտնվում են Բախմուտի ավերակներից ընդամենը մի քանի կիլոմետր հարավ։ Ուկրաինացիների բանակն ամռան սկզբից փորձում է շրջափակել Բախմուտը, որի գրավումը ռուսները մարտական կարևոր նվաճում են անվանել:
Ռուսական մի շարք ռազմական Տելեգրամ-ալիքներ երեկ հաղորդել են, որ ռուսները լքել են թե՛ Անդրեևկան, և թե՛ Կլեշչեևկան։ Նրանք, սակայն, պնդել են, որ այդ երկու ավերված բնակավայրերը գտնվում են «գորշ գոտում» և չեն վերասհկվում ոչ ռուսների, ոչ էլ ուկրաինացիների կողմից:
Կորեայի Ժողովրդական Դեմոկրատական Հանրապետության ղեկավար Կիմ Չեն Ընի անունը ներառվել է ուկրաինական «սև ցուցակում»՝ «Խաղարար» կառույցի կայքի տվյալների բազայում:
Կիմ Չեն Ընը մեղադրվում է Ուկրաինայի տարածքային ամբողջականությունը չճանաչելու համար:
Այդ կայքում Կիևը գրանցում է պետական, քաղաքական կամ հասարակական գործիչներին, ինչպես նաև բիզնեսի, սպորտի և մշակույթի բնագավառների ներկայացուցիչներին, ովքեր այս կամ այն եղանակով սատարում են Ուկրաինայի վրա Ռուսաստանի հարձակմանը:
Կիմ Չեն Ընի անձնական տվյալները սեպտեմբերի 6-ին են հայտնվել «Խաղարարի» կայքում:
ՄԱԿ-ի Գլխավոր ասամբլեայի 78-րդ նստաշրջանում հաջորդ երեքշաբթի՝ սեպտեմբերի 19-ին կմեկնարկի քաղաքական բանավեճերի փուլը: Ենթադրվում է, որ տեղի կունենա Անվտանգության խորհրդի հատուկ նիստ, որի օրակարգում կլինի ռուս-ուկրաինական պատերազմը:
Politico պարբերականի փոխանցմամբ՝ եթե այդ նիստին մասնակցելու հրավեր ստանա Ուկրաինայի նախագահ Վլադիմիր Զելենսկին, ապա չի բացառվում, որ նա մի սեղանի շուրջ կնստի Ռուաստանի ներկայացուցիչների, այդ թվում՝ արտաքին գործերի նախարար Սերգեյ Լավրովի հետ:
Զելենսկին Գլխավոր ասամբլեայում ելույթ կունենա սեպտեմբերի 19-ին՝ օրվա երկրորդ կեսին:
Ուկրաինայի և Ռուսաստանի հետևակների արյունալի կռիվներից և հրետանային հարվածներից զատ կողմերը նաև օդային թեժ մարտեր են մղում:
Օդում ռուսների երբեմնի գրեթե լիակատար գերակայությունը որոշ չափով նվազել է, քանի որ ուկրաինական կողմն էլ է սկսել ակտիվորեն անօդաչուներ կիրառել:
Ուկրաինայի անվտանգության ծառայության հակահետախուզության ջոկատները և ծովային ուժերի ստորաբաժանումն անցած գիշեր հատուկ գործողություն են իրականացրել և գրավված Ղրիմում՝ Եվպատորիայի մոտակայքում հարվածներ են հասցրել ռուսների հակաօդային պաշտպանության համակարգին:
«Ազատություն» ռադիոկայանի ռուսական ծառայության «Նաստոյաշչեե վրեմյա» ծրագրի թղթակիցը, հղում անելով Ուկրաինայի անվտանգության ծառայության անանուն աղբյուրին, հաղորդում է, որ ուկրաինացիները կարողացել են ոչնչացնել С300/400 «Триумф» տեսակի ՀՕՊ կայան, որի արժեքը մեկ միլիարդ 200 միլիոն դոլար է:
ԱՄՆ-ն ընդլայնում է Ռուսաստանի դեմ պատժամիջոցները՝ ներառելով պաշտպանական արդյունաբերության, էներգետիկ և ֆինանսական ոլորտների ավելի մեծ թվով ընկերություններ: Նման հայտարարությամբ են հանդես եկել ԱՄՆ պետքարտուղար Էնթոնի Բլինքենը և Ֆինանսների նախարարությունը։
«ԱՄՆ Պետդեպարտամենտը և Ֆինանսների նախարարությունը լրացուցիչ պատժամիջոցներ են կիրառում ավելի քան 150 ֆիզիկական անձանց և կազմակերպությունների նկատմամբ», - ասվում է Բլինքենի գրավոր հայտարարության մեջ։
Սահմանափակումները կիրառվում են՝ կապված Ռուսաստանի կողմից Ուկրաինա ներխուժման հետ։
Բլինքենի խոսքով՝ Պետդեպարտամենտը կիրառում է պատժամիջոցները՝ փորձելով սահմանափակել ոչ միայն Ռուսաստանի նավթի և գազի արդյունահանումը, այլև նրա «արտահանման ներուժը» և գործունեությունը «մետալուրգիական և հանքարդյունաբերական հատվածներում»։
Բացի այդ, սահմանափակումներն ուղղված են «ռուսական սպառազինության համակարգերի, այդ թվում՝ «Կալիբր» թևավոր հրթիռի արտադրությամբ և վերանորոգմամբ զբաղվող բազմաթիվ կազմակերպությունների դեմ։
Պատժամիջոցների տակ է հայտնվել նաև վրաց գործարար Օթար Պարցխալաձեն, ով, ըստ Միացյալ Նահանգների, Ռուսաստանի շահերի համար ազդում է Վրաստանի հանրության և քաղաքականության վրա։
Դոնեցկի շրջանի Բախմուտի մոտ հարձակման ժամանակ ուկրաինացի զինվորականները վերահսկողության տակ են վերցրել քաղաքից հարավ գտնվող Անդրեևկա գյուղը։ Այս մասին հինգշաբթի օրը հայտարարել է Ուկրաինայի պաշտպանության փոխնախարար Աննա Մալյարը։
Չնայած Մալյարի այս հայտարարությանը, դրանից կարճ ժամանակ անց Բախմուտի մոտ հարձակումն իրականացնող 3-րդ գրոհային բրիգադի պաշտոնական ալիքը հայտնեց, որ Անդրեևկայի գրավման մասին հայտարարությունը «վաղաժամ» է արվել, «ծանր մարտերը» շարունակվում են Անդրեևկայում և Կլեշչևկայում։
Գարնան վերջից ուկրաինացի զինվորականները հարձակում են իրականացնում Բախմուտի ուղղությամբ, այն բանից հետո, երբ բուն քաղաքը «Վագների» մասնակցությամբ երկար գրոհից հետո անցել էր Ռուսաստանի վերահսկողության տակ։
Անդրեևկան Բախմուտի մոտ ուկրաինացի զինվորականների կողմից վերագրավված առաջին բնակավայրն է։
Ռուսական մի շարք ռազմական Տելեգրամ ալիքներ նախօրեին արդեն հայտնել էին, որ ռուս զինվորականները լքել են ինչպես Անդրեևկան, այնպես էլ հարևան Կլեշչեևկան։ Նրանք, սակայն, պնդում էին, որ ավերված երկու բնակավայրերն էլ գտնվում էին այսպես կոչված՝ «գորշ գոտում», այսինքն՝ չէին վերահսկվում ոչ մի կողմից։