«Կտրիճ Ներսիսյանին հորդորում եմ րոպե առաջ հեռանալ Վեհարանից», - իր ֆեյսբուքյան էջում գրել է վարչապետ Նիկոլ Փաշինյանը։
Փաշինյանը Հայաստանյայց Առաքելական Սուրբ Եկեղեցու բոլոր հավատավոր հետևորդներին եւ նրա արժեքներին հավատարիմ բոլոր հոգևորականներին հորդորում է «հստակ ձևակերպել Վեհարանն ազատելու՝ Կտրիճ Ներսիսյանին ուղղված իրենց պահանջը և դրա մասին բարձրաձայնել»։
«Մայր Աթոռ Սուրբ Էջմիածինը մեր ազգային բարոյականության էպիկենտրոնն է։ Երբ այդ էպիկենտրոնը գտնվում է Աստծո առաջ իրենց ուխտը դրժած, այլասերված, նույնիսկ աշխարհիկ մարդկանց համար անընդունելի եւ արգահատելի բարոյական կերպարով ու ապրելակերպով մարդկանց ղեկավարման ներքո, նշանակում է կասկածի տակ է դրված մեր բարոյականությունը», - գրել է վարչապետը։
Նիկոլ Փաշինյանը երկու շաբաթ առաջ ազդարարել էր, որ համակարգող խորհուրդ է ձևավորում կաթողիկոսին փոխելու համար, առաջին 10 հոգուն անձամբ կընտրի՝ «հոգու աչքերով»: Վարչապետն ինքը չափորոշիչներ է սահմանել՝ թե ովքեր կարող են դիմել. ամբողջ հոգով Հիսուսին հավատացողներ, ամեն օր աղոթողներ և այլն:
Նիկոլ Փաշինյանը իր ֆեյսբուքյան գրառումներով պահանջել է, որ Մայր Աթոռը պարզաբանի՝ արդյո՞ք Գարեգին Բ–ն խախտել է կուսակրոնության ուխտը և զավակ ունի, ապա պնդել, թե զավակ ունի:
Գարեգին Երկրորդ Վեհափառ հայրապետը հայտարարել է՝ հավատում է, որ «խոհեմությամբ, առանց ավելորդ հուզականության պիտի կարողանան հաղթահարել այս դժվարությունը»։
