Ռուսաստանի ու Չինաստանի նախագահները դատապարտել են Իսրայելին՝ Իրանին հարվածելու համար, ընդգծելով, որ պետք է գնալ լարվածության թուլացման և խնդրի դիվանագիտական լուծման, հայտնել է Կրեմլը Պուտինի և Սի Ցզինպինի միջև այսօր տեղի ունեցած հեռախոսազրույցից հետո։
Իսրայելի պաշտպանության նախարարը հայտարարել է, թե Իրանի գերագույն հոգևոր առաջնորդը չի կարող այլևս ողջ մնալ՝ Իսրայելի հիվանդանոցն ու բնակելի շենքերը թիրախավորելուց հետո։
«Զինվորականներին հրահանգ է տրվել, և նրանք գիտեն, որ իրենց բոլոր նպատակներին հասնելու համար այս մարդը չպետք է շարունակի գոյություն ունենալ», - ասել է Իսրայել Կացը։
Իրանն այսօր վաղ առավոտյան հարվածել է Իսրայելի հարավում գտնվող հիվանդանոցներից մեկին։ Կադրերում երևում է, որ շենքը գրեթե հիմնովին փլուզվել է:
Ըստ հիվանդանոցի տնօրինության՝ զոհեր կամ տուժածներ չկան։
Իրանական հարվածների թիրախում են եղել նաև Թել Ավիվի մոտակայքում գտնվող մի քանի այլ բնակելի շենքեր։ Առնվազն 40 մարդ վիրավորվել է։
Իսրայելի բանակը այսօր առավոտյան հաղորդել է, որ անցած գիշեր 40 կործանիչ ինքնաթիռներ ավելի քան 100 ռումբով հարձակվել են իրանական տասնյակ ռազմական օբյեկտների վրա: Ըստ պաշտոնական հաղորդագրության՝ թիրախների թվում է եղել նաև Արաքի ծանր ջրի ռեակտորը:
Թեհրանը հայտարարել է, թե «ճառագայթային վտանգ չկա», և որ օբյեկտը տարհանվել էր հարձակումից առաջ:
Իրանի պետական լրատվամիջոցները հաստատել են՝ արտգործնախարար Աբաս Արաղչին վաղը Ժնևում կհանդիպի եվրոպացի գործընկերների հետ։
Գերմանիայի, Ֆրանսիայի և Մեծ Բրիտանիայի արտգործնախարարները նախատեսում են ուրբաթ օրը Ժնևում միջուկային բանակցություններ անցկացնել Իրանի արտգործնախարարի հետ, հաղորդում է Reuters-ը՝ հղում անելով գերմանացի դիվանագիտական աղբյուրին:
Աղբյուրի համաձայն՝ նախարարները նախ կհանդիպեն Եվրոպական միության բարձր ներկայացուցիչ Կայա Կալլասի հետ՝ Ժնևում Գերմանիայի հյուպատոսարանում, այնուհետև կանցկացնեն համատեղ հանդիպում Աբբաս Արաղչիի հետ։
Իսրայելի վարչապետ Բենիամին Նեթանյահուն հայտարարել է, որ Իրանը «ծանր գին կվճարի» Իսրայելի հարավում գտնվող հիվանդանոցի վրա հրթիռ արձակելու համար։
Իսրայելը հայտարարել է, որ հիվանդանոցի վրա հարձակումից հետո բանակին հրամայվել է «ուժեղացնել» Իրանի վրա հարվածները:
Իրանի և Ռուսաստանի ռազմավարական գործընկերության համաձայնագրում պաշտպանության ոլորտի հետ կապված որևէ դրույթ չկա, հայտարարել է ՌԴ նախագահը՝ պատասխանելով Թեհրանին հնարավոր ռազմական աջակցության մասին հարցին:
«Մեր իրանցի բարեկամները անգամ չեն էլ խնդրում մեզ նման բան։ Այսպիսով, փաստացի քննարկելու բան չկա», - ասել է նա: