Բրյուսելը արտահերթ նիստ է հրավիրում
ԵՄ դիվանագիտության ղեկավար Կայա Կալասը երեքշաբթի տեսակապով հանդիպման է հրավիրել դաշինքի անդամ երկրների արտգործանախարարներին՝ քննարկելու Մերձավոր Արևելքի իրադարձությունները, տեղեկացնում է ԵՄ արտգործնախարարի խոսնակը։
«Հանդիպումը հնարավորություն կտա մտքեր փոխանակել, համակարգել Թել Ավիվի և Թեհրանի հետ դիվանագիտական կապերը եւ հնարավոր հաջորդ քայլերը»,- փոխանցել է Եվրամիության պաշտոնյան։
Իրանի հակաօդային պաշտպանության համակարգերը երկրի հարավ-արևմուտքում մարտական պատրաստության վիճակի են բերվել , հաղորդում է Mehr լրատվական գործակալությունը։
«Մի քանի րոպե առաջ Ահվազում գտնվող մի շարք տեղանքներում ակտիվացվել են ՀՕՊ համակարգեր՝ թշնամական թիրախներին հակազդելու համար», - հայտնում է գործակալությունը։
Իսրայելի բանակը հայտարարել է, որ հարվածների ալիք է սկսել Իրանի արևմուտքում գտնվող տասնյակ հրթիռային թիրախների դեմ։ Առայժմ այլ մանրամասներ չեն հաղորդվել։
Նեթանյահու. Իրանը միջուկային 9 ռումբի համար բավարար ուրան ունի
Իսրայելի կողմից Իրանին հարվածելուց հետո իր առաջին հեռուստատեսային հարցազրույցում վարչապետ Բենիամին Նեթանյահուն պնդել է, որ ըստ իսրայելական հետախուզության, Իրանն ունի բավարար քանակությամբ ուրան՝ ինը միջուկային ռումբ ստեղծելու համար։
«Մենք երկրորդ հոլոքոստ չենք ուզում՝ միջուկային հոլոքոստ», - ասել է Նեթանյահուն Fox News-ի հետ հարցազրույցում։ Իսրայելական հետախուզությունը, ըստ Նեթանյահուի, տվյալներ ունի, որ Իրանը մտադիր էր այդ միջուկային զենքը տրամադրել իր դաշնակիցներին, այդ թվում՝ հութիներին։
Թրամփն արգելել է Խամենեիին սպանելու ծրագիրը. Reuters
ԱՄՆ երկու պաշտոնյաներ Reuters-ին հայտնել են, որ ԱՄՆ նախագահ Դոնալդ Թրամփը վետո է դրել Իրանի գերագույն առաջնորդ այաթոլլահ Ալի Խամենեիին սպանելու՝Իսրայելի ծրագրի վրա։
«Իրանցիները ամերիկացու չեն սպանել, չէ։ Մինչև նրանք դա չանեն, մենք չենք էլ դիտարկում քաղաքական ղեկավարությանը թիրախավորելու հնարավորությունը», - ասել է ԱՄՆ վարչակազմի բարձրաստիճան պաշտոնյան։
Երբ Reuters-ը այս մասին հարց է ուղղել Իսրայելի վարչապետին, Նեթանյահուն չի հերքել տեղեկությունը, միաժամանակ ասել է, թե չի ուզում այդ թեմայով խոսել։
Թուրքիայի նախագահ Ռեջեփ Էրդողանը զանգահարել է Միացյալ Նահանգների նախագահ Դոնալդ Թրամփին՝ հորդորելով անհապաղ միջոցներ ձեռնարկել և կանխել աղետը, որը «կարող է կրակի տալ տարածաշրջանը»։
Քիչ առաջ Իսրայելի զինված ուժերը հայտարարել են, որ հարվածել են Իրանի արևելքում գտնվող Մաշհադ օդանավակայանին։ Թել Ավիվը պնդում է, թե սա ուրբաթ օրվանից ի վեր Իրանի ամենախորքը հասած հարվածն է:
The New York Times-ի կողմից ստուգված կադրերում երևում է՝ օդանավակայանում ծուխ է բարձրանում, սակայն դեռևս պարզ չէ, թե ինչ է եղել թիրախում:
Իրանական պետական լրատվամիջոցները հայտարարում են, թե օդանավակայանի շենքը կամ թռիչքուղիները չեն վնասվել։
Նեթանյահուն կրկին սպառնում է
Իսրայելի վարչապետը հայտարարել է, որ Իրանը «շատ բարձր գին» կվճարի իսրայելցի խաղաղ բնակիչների մահվան համար։
Նեթանյահուն այցելել է Բաթ Յամ, որտեղ բնակելի շենքի հրթիռակոծությունից այսօր կանայք և երեխաներ էին զոհվել։ Նա կրկնել է, որ Իրանը «գոյութենական սպառնալիք» է Իսրայելի համար և հավաստիացրել, թե ռազմական գործողությունները կշարունակվեն, քանի դեռ այդ սպառնալիքը չի չեզոքացվել։
Իրանի առողջապահության նախարարությունը հայտարարել է, որ անցած երեք օրերի իսրայելական հարվածների հետևանքով Իրանում զոհվել է առնվազն 128 մարդ, վիրավորվել՝ ավելի քան 900-ը։
Ով է գլխավորելու Իսլամական հեղափոխության պահապանների կորպուսը
Իրանը հայտարարել է, թե այսուհետ երկրի ամենաազդեցիկ ուժային կառույցը՝ Իսլամական հեղափոխության պահապանների կորպուսը, կգլխավորի գեներալ Ահմադ Վահիդիին։ Նրա նախորդը՝ գեներալ Հոսեյն Սալամին, սպանվեց ուրբաթ՝ Իսրայելի առաջին օդային հարվածների ժամանակ։
Գեներալ Վահիդին Իրանից դուրս առավել հայտնի է որպես 1994 թվականին Բուենոս Այրեսի հրեական մշակութային կենտրոնի ռմբակոծության կազմակերպիչ, ահաբեկչություն, որի հետևանքով զոհվել էր 85 մարդ, հարյուրավորները՝ վիրավորվել։
Արգենտինայի դատախազները հինգ իրանցի պաշտոնյաների, այդ թվում՝ գեներալ Վահիդիին ձերբակալելու օրդեր էին տվել ՝ հարձակումը «պլանավորելու, ֆինանսավորելու և իրականացնելու» համար։
Գեներալը ծնվել է 1958 թվականին Իրանի կենտրոնական Շիրազ քաղաքում։ 1979 թվականի իրանական հեղափոխության ժամանակ նա ուսանող էր Շիրազի համալսարանում և մոտավորապես այդ ժամանակ էլ միացել է Իսլամական հեղափոխության պահապանների կորպուսին։ Ավելի ուշ նա ստացել է ռազմավարական ուսումնասիրությունների դոկտորի կոչում։
1980 թվականին սկսված և ութ տարի շարունակված իրանա-իրաքյան պատերազմի ընթացքում Վահիդին զբաղեցրել է մի շարք բարձրաստիճան պաշտոններ անվտանգության ոլորտում։ 1988 -ից՝ մոտ տասը տարի, ղեկավարել Կորպուսի հատուկ նշանակության «Քուդս» խմբավորումները, որոնք մասնագիտացած են հետախուզության և Իրանից դուրս իրականացվող գործողությունների մեջ։
2005 թվականից գեներալ Վահիդին ծառայել է որպես պաշտպանության փոխնախարար, 2009 թվականին նշանակվել պաշտպանության նախարար՝ պաշտոնավարելով մինչև 2013 թվականը։ Նա նաև երեք տարի եղել է Իրանի ներքին գործերի նախարար՝ մինչև անցյալ տարվա օգոստոսը։
Միացյալ Նահանգները, Եվրամիությունը, Կանադան և Մեծ Բրիտանիան պատժամիջոցներ են կիրառել գեներալի նկատմամբ՝ մարդու իրավունքների խախտումների համար։
