Բրազիլիայի նախագահ Լուիս Ինասիո Լուլա դա Սիլվան հայտարարել է, որ Վլադիմիր Պուտինը 2024 թվականին G20 գագաթնաժողովում չի ձերբակալվի, եթե որոշի անձամբ մասնակցել դրան։ Նա հաստատել է, որ ՌԴ նախագահին հրավիրում է Ռիո դե Ժանեյրոյում կայանալիք G20-ի հաջորդ հանդիպմանը և երաշխավորում նրա անվտանգությունը։
Այս տարի Պուտինը չի մասնակցել Դելիում G20-ի գագաթնաժողովին։ Ռուսաստանը ներկայացրել է արտգործնախարար Սերգեյ Լավրովը։ Պուտինը չի մասնակցել նաև Յոհանեսբուրգում BRICS-ի գագաթնաժողովին. նա հանդիպումներին մասնակցել է տեսակապով։
Շաբաթ օրը G20-ի երկրները համաձայնության են եկել հռչակագրի շուրջ, որն ուղղակիորեն չի դատապարտում Ռուսաստանի ռազմական միջամտությունն Ուկրաինա: Փաստաթղթում միայն ասվում է, որ բոլոր պետությունները պետք է գործեն ՄԱԿ-ի կանոնադրության նպատակներին ու սկզբունքներին համապատասխան, զերծ մնան սպառնալիքներից և հետևեն ցանկացած պետության տարածքային ամբողջականության և քաղաքական անկախության սկզբունքին։
Բրազիլիան ստորագրել է Հռոմի ստատուտը, որը հանդիսանում է Միջազգային քրեական դատարանի հիմքը։ Հաագայի դատարանն այս փետրվարին նախագահ Վլադիմիր Պուտինին ձերբակալելու օրդեր է տվել։
Վրաստան այցելած Եվրոպական միության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելն այսօր ասել է, թե Միությունը կշարունակի աջակցել Ուկրաինային «այնքան ժամանակ, որքան անհրաժեշտ է»:
Նրա խոսքով՝ Եվրամիությունն ակնկալում է, որ միջազգային գործընկերները և նրանց թվում Վրաստանը կհամակարգեն Ռուսաստանի միջազգային մեկուսացմանն ուղղված գործողությունները: «Ուստի մենք ողջունում ենք ձեր ջանքերը, որոնց նպատակն է պայքարել Ռուսաստանի նկատմամբ սահմանված պատժամիջոցները շրջանցելու դեմ», - ասել է Բորելը:
Միացյալ Նահանգները երբեք չի ճանաչի Ուկրաինայի գրավված տարածքներում Ռուսաստանի անցկացրած ապօրինի ընտրությունների արդյունքները, X սոցիալական ցանցում (նախկինում՝ Twitter) գրել է ԱՄՆ պետական քարտուղար Էնթոնի Բլինքենը:
Նրա փոխանցմամբ, այդ «ընտրությունները» ոչ լեգիտիմ են և հակասում են ՄԱԿ-ի կանոնադրությունը։
«ԱՄՆ երբեք չի ճանաչի Ռուսաստանի հավակնությունն Ուկրաինայի ինքնիշխան տարածքի նկատմամբ»,- գրել է պետքարտուղարը և ավելացրել, որ Միացյալ Նահանգները կշարունակի Ուկրաինային սատարել «այնքան ժամանակ, որքան անհրաժեշտ է»:
Գալիք կիրակի օրը Ռուսաստանում տեղի կունենան տարբեր մակարդակների, այդ թվում՝ Պետական դումայի պատգամավորների լրացուցիչ ընտրություններ:
Մի շարք շրջաններում կընտրվեն ղեկավարների և տեղական օրենսդիր մարմինների պատգամավորներ։ Մոսկվան նախատեսում է նաև «քվեարկություն» կազմակերպել Ուկրաինայի գրավյալ տարածքներում։
Ռուսական զորքերն այսօր առավոտյան հրթիռային հարվածներ են հասցրել Կրիվոյ Ռոգին, Սումիին և Զապորոժիեին:
Կրիվոյ Ռոգում, ինչպես հայտարարել է Դնեպրոպետրովսկի շրջանային ռազմական վարչության ղեկավար Սերգեյ Լիսակը, ռուսական հրթիռը վարչական շենք է խոցել: «Նախնական՝ 1 զոհ և 9 վիրավոր, 3-ը դուրս են բերվել փլատակներից։ Ավտոտնակներ են հրդեհվել։ Հրդեհ է 200 քմ տարածքում»,- գրել է նա իր Telegram ալիքում։
Ուկրաինայի Արտակարգ իրավիճակների պետական ծառայությունը պարզաբանել է, որ հարվածը հասցվել է այն շենքին, որտեղ գտնվում էր նաև ոստիկանական բաժանմունքը, ոստիկան է զոհվել։ Փրկարարները փլատակներից դուրս են բերել ևս 3 հոգու, ովքեր ծանր վիճակում հոսպիտալացվել են։ Գերատեսչությունից նշել են, որ ոստիկանության 6 աշխատակից ստացել է տարբեր ծանրության վնասվածքներ։
Ուկրաինայի ՆԳՆ ղեկավար Իգոր Կլիմենկոն ավելի ուշ հայտնել է, որ Կիևի ժամանակով ժամը 10-ի դրությամբ Կրիվոյ Ռոգի վրա հրթիռային հարձակման հետևանքով վիրավորների թիվը հասել է 25-ի։
Սումիում հրթիռը հարվածել է առանձնատան, որն ամբողջությամբ ավերվել է։ Մարզային արտակարգ ծառայության տվյալներով՝ փրկարարները տան փլատակներից դուրս են բերել տղամարդու և կնոջ, նրանց վիճակը գնահատվում է ծանր։
Զապորոժիեի վրա հարձակման հետևանքով ոչնչացվել են քաղաքացիական ենթակառուցվածքային օբյեկտներ, վիրավորվել է մեկ մարդ, պայթյունի էպիկենտրոնի մոտ գտնվող 30 բնակելի բարձրահարկ շենքերի և մի քանի ուսումնական հաստատությունների ապակիներ պայթյունի ալիքը կոտրել է։
ԱՄՆ իշխանությունները հայտարարել են Ուկրաինային 600 միլիոն դոլարի չափով ռազմական օգնության նոր փաթեթ հատկացնելու մասին, որը կներառի հակաօդային պաշտպանության և ականազերծման համակարգերի սարքավորումներ։ Այս մասին հայտնում է Պենտագոնի կայքը։
Սա ռազմական օգնության երրորդ փաթեթն է, որ Միացյալ Նահանգները տրամադրում է Ուկրաինային վերջին երկու օրվա ընթացքում։
Ավելի վաղ պաշտոնական այցով Կիևում գտնվող ԱՄՆ պետքարտուղար Էնթոնի Բլինքենը հայտարարել էր, որ ամերիկյան իշխանությունները 1 միլիարդ դոլարի ռազմական օգնության փաթեթ են հատկացնում Ուկրաինային, որից ավելի քան 665 մլն դոլարը կուղղվի ռազմական օգնությանը և քաղաքացիական անվտանգությանն աջակցությունը: Նույն օրը ԱՄՆ պաշտպանության նախարարությունը հայտարարեց Ուկրաինային 175 մլն դոլար ընդհանուր ծավալով ռազմական օգնության նոր փաթեթ հատկացնելու մասին, որն առաջին անգամ ներառում էր Abrams տանկերի համար արկեր։
Ուկրաինական զորքերի գլխավոր շտաբը հայտարարում է Մելիտոպոլի ուղղությամբ հարձակողական գործողության շարունակության մասին՝ «Քայլ առ քայլ ազատագրվում են օկուպացված տարածքները»։ Ամփոփման մեջ մանրամասներ չեն նշվում։
Պատերազմի ուսումնասիրության ամերիկյան ինստիտուտի փորձագետները պնդում են, որ ուկրաինական ուժերը գրավել են Վերբովոյեի ռուսական պաշտպանական գծի խրամատների մի մասը։
Սա համարվում է ուկրաինական հարձակման հիմնական հարվածի ուղղությունը՝ Զապորոժիեի մարզում Օրեխով քաղաքից մինչև Տոկմակ՝ ռուսական զորքերի նյութատեխնիկական ապահովման կենտրոն, Մելիտոպոլի ուղղությամբ։
Ուկրաինական զորքերը երկար մարտերից հետո ազատագրեցին Ռաբոտինո գյուղը, խրվելով ռուսական պաշտպանության մեջ Նովոպրոկոպովկա և Վերբովոյե գյուղերի միջև, որտեղով անցնում են ռուսական էշելոնային պաշտպանության առաջին գծի հիմնական ամրությունները՝ «Սուրովիկինի գիծը»: Ուկրաինական ուժերի բեկումը կարող է զգալիորեն բարդացնել ռուսական զորքերի պաշտպանությունը։
ԱՄՆ պաշտպանության նախարարության հետախուզական գործակալության վերլուծության տնօրեն Թրենթ Մոլը գնահատել է Ուկրաինայի կողմից ռուսական պաշտպանության բեկման հավանականությունը 40-50%: Նա նշել է, որ և՛ Սերգեյ Սուրովիկինը, ով պաշտպանական գծեր է կառուցել, և՛ Եվգենի Պրիգոժինը, ում վարձկանները վերջին մեկ տարում Ռուսաստանի համար ամենամեծ հաջողությունն են գրանցել, այլևս չեն մասնակցում պատերազմին։ Միևնույն ժամանակ, զինամթերքի բացակայությունը և եղանակի վատթարացումը կբարդացնեն ուկրաինական առաջխաղացումը, հավելել է նա։ Ամեն դեպքում, արևմտյան փորձագետների ճնշող մեծամասնությունը համարում է, որ պատերազմը դեռ երկար է տևելու։
Միացյալ Նահանգների պաշտպանության նախարարությունը հայտարարել է Ուկրաինային օգնության հերթական փաթեթ տրամադրելու մասին, որը կներառի այդ թվում ամերիկյան Abrams տանկերի համար արկեր։
Վաշինգտոնը Կիևին կտրամադրի ևս 1 միլիարդ դոլար արժողությամբ օգնության նոր փաթեթ, հաստատել է ԱՄՆ պետքարտուղար Էնթոնի Բլինքենը Ուկրաինայի արտգործնախարար Դմիտրի Կուլեբայի հետ համատեղ ասուլիսի ժամանակ։
Պաշտոնական այցով Կիևում գտնվող Բլինքենը հայտարարել է, որ Վաշինգտոնն Ուկրաինային կփոխանցի նաև բռնագրավված ռուսական ակտիվները։ Նա չի նշել այդ ակտիվների չափը և կոնկրետ երբ տեղի կունենա փոխանցումը, սակայն եթե տեղի ունենա, դա կլինի Վաշինգտոնի առաջին նման քայլը։ «Նրանք, ովքեր նպաստել են Պուտինի ագրեսիվ պատերազմին, պետք է վճարեն դրա համար», - ասել է պետքարտուղարը։
Ուկրաինայի Օդեսայի շրջանի վրա անօդաչու թռչող սարքերի հերթական գիշերային հարձակման հետևանքով վնասվել են քաղաքացիական և նավահանգստային ենթակառուցվածքային օբյեկտներ, հայտնել է Օդեսայի շրջանային ռազմական վարչակազմի ղեկավար Օլեգ Կիպերը։
Նրա խոսքով՝ հարձակումը տևել է երեք ժամ, ինչպես անցած գիշեր:
«Սա չորրորդ հարձակումն է Իզմայիլի շրջանում վերջին հինգ օրվա ընթացքում»,- գրել է նա X-ում։
«Շահեդների» այսօրվա հարձակման հետևանքով մի քանի բնակավայրերում վնասվել են քաղաքացիական և նավահանգստային ենթակառուցվածքներ», - գրել է Կիպերը՝ հավելելով՝ բեռնատարի վարորդ է ոտքի թեթև վնասվածք ստացել։
Մոսկվայի քաղաքապետ Սերգեյ Սոբյանինը հայտարարել է քաղաքի վրա անօդաչու թռչող սարքի հարձակումը հակաօդային պաշտպանության ուժերի կողմից կանխելու մասին։
«Այս գիշեր Ռամենսկի քաղաքային թաղամասում հակաօդային պաշտպանության ուժերը խափանել են Մոսկվայի վրա անօդաչու թռչող սարքի հարձակման փորձը: Բեկորների ընկնելու վայրում, նախնական տվյալներով, ավերածություններ կամ զոհեր չեն եղել», - այսօր գրել է Սոբյանինը X-ի իր ալիքում:
Դոնի Ռոստով քաղաքի կենտրոնում էլ անօդաչու թռչող սարք է ընկել՝ նկատելի վնաս հասցնելով շենքերին։
Ռոստովի մարզի նահանգապետ Վասիլի Գոլուբևը հայտնել է, որ երկու անօդաչու թռչող սարք են խոցել, «մեկն ընկել է քաղաքից դուրս՝ Ռոստովի արևմտյան մասում», երկրորդը՝ կենտրոնում՝ Պուշկինսկայա փողոցի մոտ։
Հաղորդվում է, որ մեկ մարդ վիրավորվել է, սակայն նա հրաժարվել է հոսպիտալացումից, մի քանի մեքենաներ են վնասվել։
Իսկ Բրյանսկի նահանգապետ Ալեքսանդր Բոգոմազը հայտարարել է հակաօդային պաշտպանության միջոցներով Բրյանսկի վրա անօդաչու թռչող սարքի ոչնչացման մասին, որի բեկորների ընկնելու հետևանքով վնասվել է երկաթուղային կայարանը։
Սա վերջին մի քանի ժամվա ընթացքում Բրյանսկի շրջանում խոցված երկրորդ անօդաչու թռչող սարքն է։ Առաջինի մասին հաղորդագրությունը հայտնվել է ժամը 5:41 Բոգոմազի X-ի միկրոբլոգում։ Ավելի ուշ նահանգապետը գրեց Բրյանսկին մոտեցող երրորդ անօդաչուի ոչնչացման մասին, ոչ ոք չի տուժել, վնասներ չկան։
Ռուսաստանի նախագահի խոսնակ Դմիտրի Պեսկովը Կիևի ռեժիմին աղքատացված ուրան պարունակող արկեր մատակարարելու ԱՄՆ-ի որոշումը վատ նորություն է համարել: Այդ կապակցությամբ Պեսկովը հիշեցրել է, որ նման արկեր ակտիվորեն օգտագործվել են Հարավսլավիայում։
«Այդ արկերի օգտագործումը շատ-շատ տխուր հետևանքներ է ունեցել, որոնք արձանագրվել են նույնիսկ միջազգային կազմակերպությունների կողմից», - հավելել է նա։
Ռուսաստանի Դաշնության նախագահի մամուլի քարտուղարն ընդգծել է, որ աղքատացած ուրանով արկերի կիրառման հետևանքների պատասխանատվությունը ամբողջովին կկրի Ամերիկայի Միացյալ Նահանգները։
Չորեքշաբթի օրը Պենտագոնը հայտարարեց Կիևին 175 միլիոն դոլար արժողությամբ ռազմական օգնության ևս մեկ փաթեթ հատկացնելու մասին, որն առաջին անգամ ներառում էր Abrams տանկերի համար նախատեսված աղքատացված ուրան պարունակող արկեր։ Օգնության նոր փաթեթը, ինչպես ճեպազրույցում ասել է Սպիտակ տան մամուլի քարտուղար Կարին Ժան-Պիերը, ներառում է հրետանային զինամթերք, հակատանկային և հակաօդային պաշտպանության համակարգեր։ Նա նաև մանրամասնել է, որ Abrams տանկերը շուտով կժամանեն Ուկրաինա։