Լայվ բլոգ․ Ոստիկանությունը ուժ գործադրեց ցուցարարների, լրագրողների նկատմամբ

Ցուցարարները կոչ են անում ոստիկաններին միանալ երթին։

Ոստիկանությունը ջրցան մեքենա, «Տիգր» տեսակի մեքենա և փշալարեր է մոտեցրել Բաղրամյանի կենտրոնական հատված:

Գործողությունները ղեկավարում է Ոստիկանական զորքերի հրամանատար Լևոն Երանոսյանը:

Ոստիկանության հատուկ ջոկատայինների շուրջ 100 հոգանոց խումբը շղթա է կազմել և փակել Բաղրամյան պողոտան Ազգային ժողովի գլխավոր մուտքի մոտ:

Հայաստանի նախագահ Սերժ Սարգսյանը պատրաստակամություն է հայտնել ընդունել ցուցարարների 3-4 հոգանոց խումբ, եթե հանրահավաքի մյուս մասնակիցները հրաժարվեն երթով նախագահի նստավայր շարժվելու մտքից, քիչ առաջ «Ազատությանը» փոխանցեց Երևանի փոխոստիկանապետ Վալերի Օսիպյանը:

Չնայած ոստիկանության նախազգուշացումներին՝ ցուցարարները սկսում են շարժվել դեպի նախագահի նստավայր:

Ոստիկանությունը փակել է Բաղրամյան պողոտան:

«Ո՛չ թալանին» նախաձեռնության անդամ Մաքսիմ Սարգսյան.-«Մեր երթը, որը տեղի է ունենալու, կրում է խաղաղ բնույթ»։

Էլեկտրաէներգիայի սակագնի բարձրացման չեղարկման պահանջով «Ո՛չ թալանին» նախաձեռնության՝ իշխանություններին տված վերջնաժամկետն ավարտվեց:

Քիչ առաջ ցուցարարներին մոտեցավ Երևանի փոխոստիկանապետ Վալերի Օսիպյանը, ով հայտարարեց, որ ոստիկանությունը թույլ չի տալու երթով շարժվել Բաղրամյան 26 և կարգ խախտողները կենթարկվեն պատասխանատվության։

Օսիպյանը ցուցարարներին առաջարկեց մինչև տասը հոգանոց խումբ կազել և ստիկանների ուղեկցությամբ իրենց պահանջը նամակի տեսքով հանձնել նախագահական և այդքանով սահմանափակվել։

«Փորձեք ձեր արածին հասնել սահմանադրական ճանապարհով։ Ոստիկանությունը չի ողջունում թանկացումները, միանշանակ, բայց այն, որ ոստիկանությունը թույլ կտա Հայաստանի տարածքում որևէ մեկը, այդ թվում դուք՝ անօրինական հավաքի երթի մասնակիցներդ, կարգ խախտեք, այստեղ թող ոչ ոք չկասկածի», - հայտարարեց Օսիպյանը:

Ոստիկանությունը նոր ուժեր, տեխնիկա և արգելապատնեշներ կառուցելու համար անհրաժեշտ նյութեր, փշալարար է տեղաբաշխում Բաղրամյան փողոցում:

Ոստիկանական զորքերի հրամանատար Լևոն Երանոսյանը ղեկավարում է այս գործողությունները: Ոստիկանական նոր կուտակումներ կան Ակադեմիայի դիմաց:

Ավելի վաղ՝ ոստիկանների ուժեր էին տեղաբաշխվել Սահմանադրական դատարանի մոտ: